'Anticchia di furtuna l'omu av'a aviri,
ma lu distinu so 'un po canciari,
si c'è bisognu puru di partìri...
suffrennu, la so casa havi a lassari.

Si parti c''a valiggia di cartuni,
china di la spiranza d'arricchiri,
c''u lazzu misu a cruci pi firriuni...
e lacrimi nta l'occhi, quantu un mari.

Stari luntanu di lu propriu amuri,
d''a mogghi, figghi e tutti li cumpari
e quannu veni, scurdarisi 'u duluri...
p"u tantu soffriri e p"u tantu piniari.

Stu postu, unni ch'è duvirusu iri,
l'avissi a fari riccu prestu prestu,
turnari c"u li sordi nta muggheri...
di la so vita, gorisi lu restu.

Ma la spartenza ha statu sempri dura,
spissu signannu 'a vita a troppu genti,
di chiddi chi parteru a la vintura...
vinniru 'n tanti 'un cunchiurennu nenti.

Ma quantu lacrimi ancora c'è di jittari?
E quantu duluri ammatula s'ha spisu?
St' isula, chi s'havi abbannunari...
picchì 'u travagghiu è dda, luntanu misu.

Vito Blunda 06/11/2007