Sta terra, chi 'u Signuri ni rialau,
n''a desi, pi campari stannu 'n paci,
però di quannu l'omu l'abbitau
p''i tanti sciarri, arrè... si ntisi 'n cruci.

Di sempri, lu chiù forti ha 'ssuggittatu
a cu è chi menu forza d'iddu avìa,
sfruttannulu picchì, sennu mpustatu,
suvirchiarìi ogni jornu... ci facìa.

Trattatu peggiu d''i chiù tinti armali,
surannu nta ddu 'nfernu d''i mineri,
carriannu sutta 'u suli, petri e sali
spaccannu mazzacani... ntê pirreri.

Tanti hannu persu 'a vita ntê mulini,
'n mezzu 'i tirreni, nuzzenti jurnateri,
facennu 'a fini di li puddicini
quann'è chi su' scacciati... cu li peri.

'Unni è 'a giustizia c''u Signuri ha datu?
E l'omu a n'âtru omu 'un po "scannari",
cu 'n tuttu chi di tempu n'ha passatu
sti cosi, pari, 'un vonnu... mai canciari.

Megghiu, chi niatri omini mittemu
a raggiunari comu Diu cumanna,
s''un è accussi, 'n darrè, niatri si nn'jemu
e 'u fraccu avi pi sempri... sta cunnanna.

Vito Blunda 04/10/2007