Quannu lu nostru Diu, n'av'a chiamari,
voli di niatri la giusta prisenza,
ma fussi megghiu prima misurari,
a cu è c'arresta ca... la suffirenza.

Ognunu va pisatu quannu è appressu
a l'accumpagnamentu funirali
vidennu, s'iddu è allegru o s'è dipressu
capennu, stu duluri... quantu vali.

Primu, a cu' è chi 'un ci nni futti nenti
e di lu mortu sutta 'i baffi ridi.
Sicunnu, a cu' è ch'è puru chiù cuntenti
e 'a festa sempri a l'astracu... s''a vidi.

Terzu, a cu' è chi va mali dicennu,
chì a stessa fìni, iddu, l'avi a fari!
Quartu, a cu pi veru sta suffrennu
picchì 'u Signuri l'havi... a cunfurtari.

Però, tuttu dipenni di cu mori
chì fa canciari 'u pisu d''u duluri,
e si a ognidunu ci pisamu 'u cori
l'avemu chiù precisu... lu valuri.

Vito Blunda 14/10/2007