'U tempu passa 'u stissu
stissa vilocità...
dipenni unn'è chi semu
e chiddu chi si fa.

Si semu 'n cumpagnia
cu na bedda signura...
ci stassimu cuntenti,
ma ni vulassi un'ura.

Pi cu è chi sta 'n galera
un jornu, vali dui...
mentri a cu sta 'n vacanza,
'u tempu si ni fuji.

Pi cu sta travagghiannu
o va e veni d''a scola...
un jornu pari tantu
mentri la festa vola.

'U tempu 'un perdi tempu
e fermu nun ci sta...
pinzamu a soccu avemu
chì prestu si nni va.

Vito Blunda 30/12/2007