Marinaru senza renti
varva longa e scola nenti,
abbruciatu di lu sali
arrustutu di lu suli,
l'occhi toi sunnu scavati
picchi 'un dormi a li nuttati,
nesci spissu cu la negghia
pi manteniri 'a famigghia.
Ora a mia tu m'hâ 'scutari,
soccu pensu, t'haiu a diri:

«Tri paroli pi stu mari,
troppu spissu ngannaturi,
comu fussi chi t'ha datu
e 'n cumpenzu t'ha livatu.
Sì! L'amuri l'ha mustratu
tutti 'i voti chi hai piscatu,
ma tu un n'hai fattu senza
ne di l'amu ne d''a lenza
e 'un scurdariti dî riti,
chi vonnu essiri calati.

Tutti cosi chi poi fari
sulu si lu voli 'u mari,
picchì quannu iddu si ncazza
è capaci chi t'ammazza
e ti manna na timpesta
pi poi fariti la festa!
E sta festa t''a fa fari
nta lu funnu di lu mari
e cu aspetta dintra 'u portu...
t'avi a chianciri pi mortu
e purtariti li ciuri
na stu mari trarituri»

Nuddu c'è chi po attruvari
li taverni nta lu mari...
era megghiu chi sturiavi
e sta fini nun facivi!
Ma lu mari è calamita
e cumanna la to vita.
Marinaru 'un n'hai patruna
ma si campi... è pi furtuna.

Vito Blunda 15/06/2007