Ci sunnu nta stu munnu picciriddi
c''un hannu propriu nenti di manciari,
taliannu dintra l'occhi ê nicareddi...
capemu chiddu chi vonnu cuntari.

Di sti pirtusa 'a luci chi ci nesci
tutta la nostra carni a fa 'rrizzari
e cu havi cori si ni intinnarisci...
p''u trantulu 'un si ponnu chiù taliari.

Hannu mpirugghi grossi p'addivari,
lentu scurri lu sangu nta li vini,
'un hannu propriu nenti pi campari...
ne merici, ne mancu miricini.

Vannu calannu puru li spiranzi
si c'è quarcunu chi li po sarvari,
amentri sulu criscinu li panzi...
ma è la raggia chi ci fa vunciari.

Sti figghi hannu bisognu di cristiani
chi ô nostru Signuruzzu vonnu beni,
finennu di pinsari e jatti e cani...
aceddi, liuna, serpi e a li baleni.

Si 'un sgarru, ni lu dissi lu gran Diu:
c''u granni, sempri ô nicu, hav'a ajutari,
picchi sta terra pozza aviri 'u preju...
di virisi ogni jornu migghiurari.

Vito Blunda 23/10/2007