Jò sugnu babbiaturi e nun mi vantu,
scrivu canzuni e puru mi li cantu.
Viatri, chi siti serii vi scantati...
d'essiri tutti 'i jorna spizziunati.

Nesci di la me vucca soccu penzu,
sfacciatu si, ma jò nun pacu cenzu,
a viatri propriu nenti vi ni futti...
vuliti 'a mogghi mmiaca e china 'a vutti.

'U jornu di lu "massimu rispettu",
vi ni jiti 'n Chesa a scutulari 'u pettu
e l'àrma vostra ddà vi la lavati...
turnannu 'n casa beddi pulizziati.

E siti sempri 'i primi di la fila
chianciti puru si pirditi 'i pila,
lu vizziu propriu chi nun v'abbannuna...
pinzari a l'autri comu a na sfurtuna.

E vi sintiti tutti pacinziusi,
amentri siti propriu murritusi,
cu sta facciuzza chi v'apprisintati...
'i vostri megghiu corpa cafuddati.

Pinsati di mprusari tutta 'a genti,
campati ricchi pi moriri cuntenti,
na cosa sula m'arresta di spirari...
chi nostru Diu, giustizia n'avi a dari.

Vito Blunda 14/11/2007