Sta genti chi girannu va ntê strati
parla cu 'n versu stranu c''un è 'u nostru,
si sentinu palori mpastizzati
comu fussiru scritti... senza gnostru.

L'ebbica nova ormai n'apparigghiau:
lu vestiri, lu stari e lu parlari,
st'amica 'n casa a tutti n'ammaliau
e â moru so... ni fici allividdari.

Ma ccà ci foru sèculi di storia
e lu parlari nostru è veru anticu,
ogni duminiu n'ha datu la gloria:
d''u munnu 'a nostra lingua... è lu biddicu.

Parlamu l'èlimu, lu grecu, lu latinu,
l'arabu, lu francisi e lu spagnolu,
ni vinniru a canciari stu distinu
milli picciotti... e du' bastimenti a nolu!

Vito Blunda 10/10/2007