Doppu chi Pilatu si lavau li manu,
dèttiru a lu Signuri la so cruci;
'u populu, ringraziannu lu Rumanu...
facia gran festa e jisava la so vuci.

Cu iddu, c'eranu puru du' latruna
e 'a genti a tutti tri l'amminazzava,
stissa cunnanna, ma senza la curuna...
c'era, cu è chi chiancìa e cu ngiuriava.

Versu lu munti stanchi caminaru,
tri voti carìu Cristu nta sta strata,
'i pisa chi purtava lu stancaru...
'a Vuluntà Divina: sintinziata.

Junti dda supra 'n mezzu 'u cullucaru
ê du' cumpari li mìsiru di latu;
tri chiova, manu e peri ci chiantaru...
comu si 'n assassinu avissi statu.

Vivu lu jisaru e 'u sangu ci sculava,
'u pettu, pi sdilleggiu, ci spunnaru,
so matri, addinucchiuni si dannava…
picchì stu figghiu bonu l'ammazzaru.

Gesu a so Patri vosi addumannari,
chi 'un canuscennu la Gloria di li Celi,
si putia sti gnurantuna pirdunari...
mentri di l'occhi ci scinnia lu meli.

Vito Blunda 2007