Stidda chi nta stu lettu vi girati,
vulissi essiri jò l'unicu pinzeri...
chi nta la testa vostra v'attruvati
pi chiddu chi vi dissi l'âtr'ajeri.

Vi dissi chi ntô pettu lu me cori,
senza di vui 'un voli chiù campari,
vi dissi chi lu sulu me pinzeri...
è comu a vui v'ha fari nnamurari.

Vi dissi chi lu suli havi vriogna...
si quannu è sciutu e puru v'affacciati,
si l'acquazzina di la notti vagna...
quannu passati vui tuttu asciucati.

Davanti a vui ogni ciuri si nni sicca
chì la biddizza vostra è traritura,
picchì è palisi chi fu troppu picca...
chiddu chi a l'autri detti la natura.

Lu cori vostru è granni calamita
e a mia mi pigghia comu fussi corda
e mi fa biniriciri sta vita...
picchì la facci vostra nun si scorda.

Biatu l'omu chi vi po vasari
stu mussu duci comu fussi meli,
la me spiranza è chidda d'aspittari...
sunnannu 'i so' biddizzi senza veli.

'I picciriddi a st'ura stannu durmennu
e 'u ventu già finiu di rufuliari,
veni 'a staciuni doppu di lu 'mmernu...
e jò cu vui mi vogghiu maritari.

Ora chi vi cantai sta sirinata,
na cosa sula vogghiu mmagginari,
mentri chi vui durmiti sta nuttata...
dintra stu sonnu mi vuliti amari.

Vito Blunda 25/04/2007