Jò di tia mi staiu cucennu,
comu 'a carni nta graticchia
e sta frevi va cugghennu,
siddu m'alluntanu anticchia.

E nun c'è bisognu 'i sali
picchì stu me granni amuri
di cu' tantu tu ti sciali
havi puru un bon sapuri.

Zacquarì ntê me' pinzeri,
ntê vuredda, ntê rugnuna,
mi cattigghi lu giseri,
cori, fìcatu e purmuna.

Ti nfilasti ntâ me testa
e la porta 'a teni chiusa
e ddà dintra fai gran festa,
si' daveru capricciusa.

La to cuntintizza è granni
e nta l'occhi già t'appari,
po durari pi cent'anni...
ma di mia 'un t'alluntanari.

Vito Blunda 13/10/2007