Vidi, bidduzza mia chi tu sta notti
ntô lettu meu, m'hâ veniri a truvari,
facemu na gran festa, quattru botti
d''u ciauru to, mi vogghiu ntussicari.

Veni 'n silenziu e scrusciu 'un n'hai a fari
e talìa bonu unn'è chi metti 'i peri,
picchì cca nuddu s'avi arruspigghiari
e stai attenta puru a me muggheri.

Doppu chi ni facemu na "naschiata"
torna d'unni vinisti e nun ciatari
e si ti vogghiu arrè natra nuttata,
dintra stu lettu meu, n'âmu a scialari.

Stu cori mi lu teni carzaratu
e si putemu, chiu vicinu stamu,
comu 'n aneddu datu di lu zitu
comu lu fruttu sta attaccatu ô ramu.

Picchì nascisti fora d''u paisi?
E nun mi canuscisti chi eru schettu?
Ora comu ora facissi tanti mprisi
pi aviri a tia pi sempri ntô me lettu.

La smania chi haiu di tia mi fa suffriri
mi sentu comu 'a ligna quannu sicca,
piccatu chi stu amuri 'un po appariri
'u tempu chi n'arresta è troppu picca.

Vito Blunda 29/10/2007