D''u nostru paisi tuttu sapia,
ci vinni, ci stesi e prestu capiu
comu sta genti aiutari putia...
pigghiau lu so cori e ni lu grapiu.

Cu l'occhi e c"a vuci parlava
e tanti cosi ni fici capiri,
'a mafia st'isula cumannava...
e a tutti ni vulia, ntô so putiri.

St'omu vosi puru cunfirmari,
comu canciari sta terra si putia,
ntâ tilivisioni si misi a parlari...
di tanti mbrogghi e di cu' li facia.

Facia dumanni, dava la manu,
avia caputu chi purtamu sta cruci,
picchi 'un vulemu o 'un ni firamu...
a tagghiarici a stu mostru li rarici.

C"u malaffari stannu cumpariati:
pulìtici, duttura e dilinquenti,
jùrici, raggiuneri e avvucati...
pi struggiri, la nostra megghiu genti.

'A forza d'iddu ni rapprisintava,
sulu sta luci aviamu nta la notti.
Senza chi nuddu si l'immagginava...
spararu ô scuru, sti malacunnutti!

Ni l'arrubbaru, 'u vintisei sittembri
d"u milli novicentu ottant'ottu.
C''u vosi beni 'u porta 'n cori sempri...
e di dda notti 'un po scurdari 'u bottu.

Tanti chiancemu e tanti fistiggiaru,
stu granni faru ni vosiru astutari,
sti miciddari arrè s'organizzaru...
niatri, turnamu varca 'n tintu mari.

Doppu vint'anni, nuddu sapi ancora
cu li mannau e cu lu vosi mortu,
speramu chi cu' cerca, p'accomora...
fa trasiri sta varca dintra 'u portu.

Vito Blunda 28/10/2007