Sta terra chi pistamu sutta 'i peri
n'ha datu cintinara di tisori,
niatri 'un facemu mai boni pinseri...
pi darici lu so giustu valuri.

Lu mari e 'a fama di lu nostru "Munti"
'i furasteri ccà fannu arrivari
e di Casteddammari a Silinunti...
vennu di tuttu 'u munnu pi scialari.

Lu suli, comu un patri chî so' figghi,
ni stona 'a testa e ni fa spacinziari,
ma cu è chi va circannu maravigghi...
a niatri n'avi a veniri attruvari.

Lu ventu n'ha 'sciucatu li surura
e l'acqua stinnicchiata nte salini,
vunciatu 'i veli di li piscatura...
fattu girari 'i pali a li mulini.

Sti gran ricchizzi ccà su' cullucati
picchì populi antichi l'abbitaru,
pi fari tuttu chiddu c'attruvati...
omini cu gran lena travagghiaru.

Ma cu è c'avutu tuttu stu gran beni?
Stu postu, n''u vulìssiru arrubbari!
Voli arristari cca cu è chi ci veni...
e quannu parti, pensa arrè a turnari.

Vito Blunda 30/12/2007