Ch'è stranu di li omini 'u distinu,
chiù passa 'u tempu e chiù cala la mpurtanza
e quasi cumminissi essiri vinu...
picchì cu tempu, ci accrisci la sustanza.

Certu, finu arrivari a li trint'anni
ogni scarpuzza si senti un gran stivali
e doppu, cuminciannu li malanni...
cummattiri ogni jornu contru 'i mali.

Ma s'arrivamu a jùnciri 'i sittanta
scupremu tanti cosi cu lu scantu:
"picchì li casi, 'i Chesi e li cunventa...
sunnu chiù vecchi eppuru vannu tantu?"

Pi cu 'un capiu la forza d''a murali
senza vilenu ci la vogghiu diri:
chi l'omu ch'è chiù vecchiu menu vali...
li cosi antichi, lu fannu arricchiri!

Allura, a sti picciotti d'oggellannu,
dicemuccillu tutti c'un gran coru:
"tiniti 'n cuntu ogni vostru nannu...
facènnulu sintìri, un gran trisoru!"

Si stu discursu nun vi servi a nenti
stu gran disturbu allura mi scusati,
ma si puru vui nvicchiati lentamenti...
sti quattru me' palori, 'un vi scurdati!

Vito Blunda 24/06/2007