«Doppu d''a verra, ci foru l'elizioni
pi dari a lu paisi un parlamentu,
c'era d'assistimari sta nazioni
chî rèuli di lu cumpurtamentu.»

Chissu, dicia un jornu 'u zu Nanà,
cu 'n tuttu chi li scoli 'un avìa fattu,
capennu chi sta mala nuvità
'un 'u lassava a nenti suddisfattu.

Essennu picciutteddu, jò nun capia,
ma si ci penzu 'n testa trovu già
li du' paroli c''un addiggirìa...
eranu: dimucrazia e libbirtà.

Cuntau di na Signura misa 'n peri
cu na balanza 'n manu e chi mustrava...
na un piattu li duveri a rispittari,
nta l'autru li diritti chi ni dava.

P''u zu Nanà, sta cosa, 'un valia nenti,
ma quali urdinamenti, suttastari?
Nuddu mpirugghiu pi li nostri ntenti!
Soccu vulemu niatri... l'aêmu a fari!"

Si p''i diritti spunta quarchi ntricu
la suluzioni subitu attruvamu,
picchì ci avemu prontu un nostru amicu...
chì niatri, cu stu ntentu,'u nutricamu.

Vito Blunda 14/11/2007