È risaputu, da che munnu è munnu,
chi lu cavaddu ô sceccu ha disprizzatu,
difatti si taliamu tuttu 'n tunnu:
cu c'è ntê chiazzi, misu cullucatu?

Ci sunnu Re, scenziati o mpiraturi
e omini chi cu la propia storia
hannu mustratu gesti di valuri,
gorisi, di ddà supra, tutta 'a gloria.

Sti pezzi grossi spissu hannu 'a divisa,
e su' assittati supra un gran cavaddu,
'u mantu lisciu e cu la cura tisa,
na jamma aisata pi vidisi 'u caddu.

Un jornu lu cavaddu fu chiamatu
a dari ô sceccu puru 'a sô mpurtanza
picchì st'armalu jia rivalutatu,
ora vâ cuntu jò la me sintenza!

L'aviti vistu mai a li cavaddi...
nzignari a li picciotti na li scoli?
Cummattiri ogni jornu cu li foddi?
Fari 'i duttura dintra lu 'spitali?

Ci sunnu pirsunaggi, pi furtuna,
c'addivintaru 'i megghiu prufissura,
picchì caperu, mentri eranu arzuna,
d'essiri granni scecchi di natura.

Allura a lu cunfruntu c''u cavaddu,
è sulu 'u sceccu 'u veru vincituri.
St'armalu grossu vali quantu un jaddu
jittatu ntô bancuni d'un vucceri.

E pi finiri, dissi 'u triunfaturi:
stu pezzu 'i carni 'un sapi fari nenti!
Li scecchi su' ministri e sinaturi...
mancu un cavaddu vici prisirenti!