'U celu è ranni
sta notti
supra munzeddi di rina
unni c''a luci di migghiara di stiddi
nasciunu ciuri di giada.
Stringimi 'a manu
Frati
Cunfunnemu 'u niuru d''a to peddi.
Notti!
Riala na risatedda
a 'n vecchiu sciallu pusatu su spaddi
di manu trèmmuli ca sgranunu rusari
nta la solitudini,
abbrazza corpi asciutti
e bucchi ca cercunu pani.
Notti!
Jinchi cori ca vannu circannu a Diu.
Quagghia nivi
supra pidiati lordi di sangu,
adduma fochi ranni
pi strati senza spiranza
e comu picciriddi cantamu
cu ciauru di castagni arrustuti
e chiacemu
cu lamentu di sampugna
picchì l'incantu di stanotti vivi
e dumani è sempri Natali.
declama: Vitalba Ingardia
Autore: Concetta Confalone
|
L'attrice Vitalba Ingardia
|
e-mail -
redazione@trapaninostra.it
