|
|
|
Presentazione dell'Antologia Poetica
Mi trovu nto mezzu... chi fazzu?
|
|
Inizia il Botta e Risposta tra i nostri poeti
|
|
|
ALBERTO CRISCENTI:
Pinsannu a ddu "vecchiu tripporu"
cu Altesi e cu Vitu Lumía,
lu scrissi l'amicu Ingardía:
"Pueti cchiù bravi 'un ci foru!"
"Sia Dinu chi Vitu, 'n puisía",
cunférmanu 'i crítici 'n coru,
"pilastri ormai sunnu, su' d'oru,
dutati di granni mastría!"
Pir iddi palora è la rima:
lu versu trapassa ogni muru
e sempri raggiungi la cima.
E niatri? Ni sugnu sicuru:
fra un annu - po darsi già prima -
putemu raggiúngili puru.
|
|
|
NINO BARONE:
La vita è 'na rota chi gira,
currennu ti passa davanti;
ti cancia li cosi a l'istanti
e squagghia cchiù peggiu dâ cira.
Ricordi n'assummanu tanti,
passatu chi torna ogni sira;
succeri accussì cu la lira
di quannu la sacca è vacanti.
Fu certu 'na squatra putenti,
lu "vecchiu" cu Altesi e Lumìa:
ma ora taliàmu 'u prisenti!
Lu novu "tripporu" 'n puisìa?
Baruni, Vultaggiu, Criscenti:
diccillu a l'amicu Ingardìa!
|
|
|
GIUSEPPE VULTAGGIO:
L'amicu Ingardia nun sbagliava,
ddu "triu" d'elevatu valuri,
cantava gran versi cu amuri
e 'a genti ammirata ascutava!
"Tri Perli" di granni spissuri
la nostra "Sicilia" vantava
ma nuddu d''i tri si vaviàva,
ne nuddu mai fu "prufissuri!"
O Bettu chi fai lu ruffianu?
Ddu vecchiu tripporu valenti
pi nïautri è troppu luntanu.
Si propriu n'allarghi la menti…
ci veni un "Tripporu" nustranu:
Baruni, Vultaggiu, Criscenti!
|
|
|
|
|
e-mail -
