QUANTU E' BEDDA LA CAMPAGNA 'NTRA LA STACIUNI
poesia di Lina Clorofilla

Ntra la stasciuni 'ncittà nun si pò stari
vinemu cca 'ncampagna a rispirari,
l'aceddi di matina vannu a cantari
cu lu cantu ti fannu arruspigghiari.

Li cicali 'ntr'allarvuli acchianati
ti fannu li cchiù beddi sirinati;
ti chiamanu e ti dicinu d'affacciari
p'anticchia d'aria fina di pigghiari.

La campagna è nna cosa supraffina
quannu di frutta e ciuri è tutta china,
ricca d'oduri, ii celu e di culura
si vesti di zita tutta la natura.

Si sentinu li addini caccariari
chi parinu tanti curtigghiari,
lu addu di la sciarra sinn'adduna
e cu nna vuci a tutti l'accuppuna.

Li serpi di pirtusa ssu già sciuti
e mura mura sunnu appiccicati,
vannu circannu zitti zitti e muti
li virmiceddi ancora addummisciuti.

Lu cani misu all'erta 'ntunnu e'casi
sta attentu sempri si lu straniu trasi
e p'avvisari nun sapi comu fari
perciò si metti subitu abbaiari.

Lu suli mentri fa lu so camminu
'mmezzu d'un celu azzurru vispirtinu
cu ddu gran cauru cchiù nun si po stari
nni dici a tutti: iti a ripusari.

Stu suli è chiddu chi nni fa surari
stu suli è chiddu chi nni fa arrichiari;
di sira poi quann'è a tramuntari
puru a lu mari fa arricriari.

Picciotti, sta terra null'abbannunati,
lavuratila cu amuri e siminati
di rosi e ciuri avissi a profumari
e'nveci di stu passu ssu cosi rari
perciò approfittamu finu a quannu dura,
chiddu chi ni detti matri natura.