|
Lina Clorofilla
|
|
|
Archivio culturale di Trapani e della sua provincia
Comu mi fici me matri lu cori di Lina Clorofilla
|
|
Stu cori chi portu dintra lu pettu
mi lu fici cu amuri mè matri,
si cunsigghiau c’un granni architettu,
parlu di ddu cristianu di me’ patri,
l’accuminciau di li funnamenti,
lu fici tuttu di oro culatu,
poi ci misi un riloggiu a battenti
e un urigginali lazzu attaccatu.
Mi lu fici pi davveru scialusu
e di finirlu nun vidia l’ura,
li cosi tinti tutti fora usu
mittennuci lu beni di natura.
Di lu mari pigghiau na rizza,
l’agghiumminiau a firriari ntunnu,
e poi cu tanta dilicatizza
l’allistiu mentr’ancora era nsonnu.
Comu sintiti lu finiu di notti,
nun detti a nuddu la sodisfazioni
poi lu nghiurìu ntra la cassaforti
gilusamenti cu la cumminazioni.
Pi tutti fu na granni surpresa
quannu stu cori si misi a parlari
cu tantu amuri e tanta pritisa
mittennusi a scriviri senza stancari.
|
|
|
|
|
e-mail -