Vecchia Trapani,
chi nustargia !


Nun sugnu vecchiu pi' putiri ricurdari
Trapani 'o tempu di carrozzi e di cavaddi,
ma haiu l'età giusta pi' putiri parlari
di 'sta città e di tutti li so' cosi beddi

di 'na cinquantina d'anni a veniri 'cca.
E si dicu chi prima era n'autra crianza
v'assicuru chi chist'è para par'a virità,
nun è sulu nustragia d'a picciuttanza !

Veru è chi pi' 'bbona sorti, 'n'a tant'anni
ch'hannu passatu, i cosi hann'iutu avanti,
n'Trapani, comu a Palermo o autri banni,
e chi li novità sunn'assai e pur'mpurtanti,

ma l'haiu a diri, sentu ch'è chiù forti di mia !
Mi parìa chiù bedda assai 'sta città farcata
cu li so' stradi nichi e stritti, chini di puisìa,
quann'un c'era piriculu a fari 'na passiata !

Stradi nittati e lucenti chi parianu specchiu,
a cuntraria d'ora ch'a lurdìa nesci di l'occhi.
Nun c'eranu pirtusa, munnizza, ferru vecchiu,
e pi' fimmini 'u scantu d'appizzarici li tacchi !





















Ricordu 'a paci d'a sira, niura ma splinnenti
senza luci abbardati chi fannu mali all'occhi,
quann'era 'a luna a darini lampa furgenti,
quannu l'ura battìa lenta 'u riloggiu a tocchi !

Chi granni sfilata, poi, 'a passiata a 'la marina,
chi spittaculu 'dri varchi 'a luci d'a lampara !
Sutta l'arvuli d'u chalet nun circulava cocaina
ma suspiri d'amuri 'n 'ta 'l'aria tutta di ciurera !

Certu l'anni passanu e ora arriva' u progressu,
i stradi sunnu carrichi di machini e di palazzi
e 'n ta' li casi rintronanu canzuna di successu...
è autra vita, autri cosi, si..si...ma cosi di pazzi !

'U carritteri ch'abbanniannu chiamav'attenzioni
era 'na cosa viva e 'a so' vuci longa a cantilena
l'aspittavi 'gni matina, e facìa sempri emozzioni,
e oggi ch'un c'è chiù sent'in cori 'na granni pena !

Pi' l'oroscupu nun ti sirvia certu 'a televisioni !
Ci pinsava 'u RUNCU chi n'avia pì cent'e una !
C'a trummett'a tracolla chiamava 'a populazzioni:
"Cos'accatti co' venti lire? Accattatti la fortuna !

Emicrati, carciarati, fimmini schetti e pure maritati,
la Bertuccia intovina !" 'A sò vuci avìa 'bbon'effettu
e puru chi li sorti d'ognunu tutti sapianu già signati
comu p'incantu e pì maggìa s'accattavanu 'u bigliettu !

Era chista Trapani di 'na vota, semplici e genuina !
'Na città sempri chiù nova e sempri chiù luntana,
di cu' 'u tempu perdi signu e ricordu 'gni matina
s'un fussi p'u sò cori, p'u sciroccu e 'a tramuntana !

Sicilia bedda !




Quann'u Signuri ti fici, bedda figghia
tuttu priatu e duci ti pusau d'inta lu mari.
Quannu poi vinni l'ura di dariti parigghia
chiamau 'u suli e cu iddu ti fici maritari.

E di 'stu matrimoniu riccu di puisìa
tuttì'a filera nasceru piaciri e biddizzi
ch'apparati a bedda vista, Sicilia mia,
fannu cumparsa, annucchiati annizzi !

Ma comu la atta ch'unn'arriv'a 'la saimi
dici ch'è rancitusa, sippuru l'appitisci,
accussì sparla di tia e ni fa strippami
ch'un ti pusseri ma 'n pettu ti bramisci.

E sona 'gni ghiornu 'sta musica 'ngannusa!
Ma tu chi canusci tutti 'sti bravi sunatura
nun ci pristar'aricchi, TU sì spittaculusa !
Di li biddizzi 'a chiù bedda sì di la natura !