«Capu d'annu»
Innaru è lu misi chiù rausu
D'acqua di nivi e di gran friddurati
Porta scarsizzi e fami.
E' dulurusu Puru pi chiddi boni ammandiddati
Spissu di lampi e trona ni fà usu,
Pi latri frati starisi agguattati
Però s'unfussi tantu rigurusu
Ci fussi appressu li gran baragghiati.
Difatti innaru siddu fussi asciuttu
E nun sazziassi beni li tirreni,
Lu poviru viddanu fussi struttu
Ci fussiru pi tutti amari peni
L'arvulu un facissi bonu fruttu
E ghissi tintu cu è c'appressu veni.
«Fruaru»
Chiù curtu di li misi esti fruaru
Si dici mezzu dintra e mezzu fora
Pigghiannu mparamentu di innaru
Duna li signi nda la cannalora
S'unnivica e nun chiavi è dui fruaru
Pi liggi la mmirnata nesci fora
Ma si mpiddatu dormi u picuraru
Significa che long a e dura ancora.
Jò a sti tabù cci tegnu veru assai
Chi ssu perfettamenti funziunali
Si fà fuimmentu e favi in quantu mai
E un misi prima ngrassanu l'armali
Pira sinni fa picca un tantu assai
E purtroppu fussiru essenziali...
«Marzu»
o marzu chi si tuttu trarimenti
Cu stu gran friddu, suli e nnivarrati
Stai fascennu moriri li genti
C'an-ungiponnu merici e pumati
Li trona toi, sunnu chiù forti e azzenti
Si sentinu cristalli trantuliati.
Di tuttu chistu ancora un si cuntenti,
Curri n'apriri pi ghioma pristati.
Durici siti tutti li parenti
Quattru su li menu ammintuati
Dui siti li veru puzzulenti.
Poi tocca a chiddi sei li chiù apprizzati
Chi cudd'inganti di li so' purtenti
Fannu spirtiri puru e minurati.
«Apriri»
Quannu c'arriva apriri cu li sciuri
Di la natura fà un quatru stupendu
La primavera Maga di l'amuri
Di gran biddizzi ni fà d'ornamentu
Però succeri cangia di culuri
Pigghiannuni di marzu mparamentu
E spissu s'arricogghi un muccaturi
Di lastimi di chiantu e di turmentu.
Porta la Pasqua la risurrizzioni
Di lu Signuri ormai tantu scurdatu
Ogni'unu curri pi la sò ntinzioni
Senza sapiri chiù socchè piccatu.
A Maju po n'affida la funzioni
Di guvirnari stu subblimi statu.
«Maju»
Sciuri e simenzi a Maju sunnu ngranati
Qualunqui armalu godi e fà l'amuri
Tutti l'ortaggi sù beddi e spuntati
E lu sciloccu li ddaruna sturi.
E puru ammintuatu pi zitati
Chi puru l'api accoppianu li sciuri
E nda da maravigghia di jurnati
La prima festa è di lu zappa turi.
C'è l'ammattanza puru nde tunnari
Turtuli e quagghi pi lu cacciaturi
Poi l'Ascinzioni e vannu tutti a mari
Cu ciauru pitittu e cu sapuri
Però stu Maju d'ovannu a quantu pari
Apporta scustumanzi e raffridduri.
«Giugnu»
Giugnu è lu misi di l'amurusanza
E merita di tutti st'accoglienza
Rapi li porti letu all'abbunnanza
Chi lu viddanu tuttu l'annu penza
Cu amuri divuzioni e cu spiranza
Di pani e paci e saggia pruvirenza
Però c'è un fattu chi l'apicciuttanza
Sulu quannu ch'è ntaula ci penza.
Poi succeri puru certi voti
Fà timpurali a curriri chinati,
Purtannusi d'appressu li ricoti.
Poi nda li spiaggi sempri chiù fuddati
Ddi gran biddizzi cu custumi ascioti
Si fannu li chiù beddi assulacchiati.
«Giugnettu»
Giugnettu ch'è lu settimu di frati
Si sbrazza e si pripara a li ricoti
Cu metitrebbi, fauci e saccati
Pi lu focu chi scappa spissi voti
C'è genti assai chi morinu abbruciati
Lu cauru chi coci a tutti poti
Capaci di pirciari li balati.
Poi a lu Munti pi vintitri voti
Li cursi di li machini trucca ti
D'unni si metti a prova li piloti
Cu ficatu e mastria nda li vutati.
Mentri Giugnettu mori appena voti
Ti trovi a facci frunti l'atru frati
Chi si cunsigna l'autri ricoti.
«Austu»
Austu di trentunu è lu Suvranu
E d'è pi beru rossu e malantrinu.
Rinnova liggi e patti a lu viddanu,
Lu sfrattu e l'aumentu all'inguilinu.
Arriva l'Emigranti di luntanu,
Li feri e spenni e spassu scittatinu.
O ogghiu, mustu e sarsa metti manu
E a la staciuni ferma lu caminu.
E' misticu e amurusu a li Maronni,
Mmiriusu di so frati pi sant'Anna,
La Santa chiù mplurata di li donni
Chi nda la rogghia aiuta a duna canna.
Ovannu nesci e rumpi li culonni
Di machini assitati e fermi npanna.
«Settemmaru»
Settemmaru ch'è lu vinnignaturi
Ncumincia cu li utti arrimiggiari.
Di setti luni è lu guvernaturi
E mmiatu chiddu chi li sà smirfiari.
Li primi agneddi li primi furturi
Cu lampi e trona di fari scantari.
Tantu chi San Micheli a porta chiuri
E raccumanna a ottuviru ncurzari.
Li primi alivi vannu a salaturi
Ncumincia cu giarraffi e nuciddari
La prima tumma chi va a ntummaturi
E li miluna timugna a gianniari.
Settemmaru a la fini poi cunchiuri
C'annicchia sciatu a tutti fa pigghiari.
«Ottuviru»
Ottuviru ncumincia a trappitari,
Ringigghiu mmanu pi lu putaturi,
O puru aratu e metti a galibari.
E lu viddanu arrè cu gran sururi
Ncumincia arrè la terra a priparari.
Pi ddarici a novemmaru l'onuri
Pi poi iddu putilla siminari.
Ma sempri ntra li stenti e li furturi
Li jorna sunnu sempri curti e scuri,
Lu pisci longu è megghiu di mangiati
Qualchi muntagna cangia di culuri
Picchì la prima nivi già cumpari.
San Simuni poi lu misi chiuri
E ordina li utti d'attappari.
«Novemmaru»
Trasi nuvembri arriva cu l'usanza
Di propri morti iri a visitari.
E criu chi stu rispettu e amurusanza
E' duvirusu ogniunu c'amaffari.
Lu friddu e la mmirnata sempri avanza.
L'alivi s'incumincianu a spilari
Chi pu viddanu è l'ultima spiranza
Pi sta ricota bona arricampari.
L'arvulu talia a luntananza
Li panpini chi lu ventu fa vulari
A tutti bbanni l'erva e n'abbunnanza,
L'armali si ngumingianu a saziari.
San Martinu rapi la spiranza
Pi li simenzi nterra arrè ittari.
«Discemmaru»
Discemmaru ch'è l'ultimu di frati
Di nivi quasi sempri è cummigghiatu.
Stufi e camini sunnu già sbambati
E c'è pitittu pi qualunqui latu.
Na pocu di simenzi sunnu nati,
Lu mari si fa sempri chiù ncazzatu
Santa Luscia stira li jurnati
E ntra li massarii si pigghia sciatu.
Natali emblema di cristianitati
Festa subblimi ntuttu lu criatu.
E fa di patri puru allatri frati
Pinzannu pi lu novu parintatu.
Però n'accanza li gran scupittati
C'ammenzannotti mori fulminatu.
|
e-mail -
