Quannu chi vai a lu Munti, a stari attentu,
Davanti a Porta Carmini c'è scrittu,
Lu cantu di Virgiliu ch'è un purtentu
Di fascinu bizzarru binirittu.
Lu Munti ha statu sempri ammintuvatu
Pi storia, pi decoru e pulizia.
Di milli lotti vinni turmintatu
Tinennu pettu ad ogni tirannia.
Di Veniri l'incantu e la ruscizza
Du Baliu lu profumu di l'amuri.
Spettaculu maistusu di biddizza
Scentru di studi d'arti e di valuri.
La negghia di stu Munti fà pinzari
Na manu c'accarizza li pinzeri,
E la ruscizza viriri lu mari
Limpidu, azzurru chi ti batti e peri.
D'unni c'Anchisi ci fu vurvicatu
Patri di du Enea lu Truianu,
Chi c'è lu munumentu ancora allatu
Nvacci a tunnara di San Cusumanu.
Munti n'unn'afinissi mai di riri
Pi li biddizzi toi quantu surrari.
N'un c'è turista chi si ni pò ghiri
Senza chi mai di tia si pò scurdari.
|
e-mail -
