LU TERREMOTU DI GIBBELLINA

Quannu c'arrivai a Gibbellina
Ntisi un friddu ntutta la pirsuna,
Un friddu di trageria e di ruvina
C'acchiangiri l'ammita ogni pirsuna.
Puru l'armali vaganu dulenti
Ntra li mascerie fami e patimenti.

E siddu dumannari ci putissi
Pi risposta certu m'aspittassi.
Ah! siddu la terra si rapissi
Di sta ruvina ardenti nni livassi.
Sugnu sicuru chi parinu diri:
Li nostri genti d'unneru a finiri?

Na pocu sunnu morti e lu sapemu,
C'era un lamentu d'armali e cristiani
Chi ora tutti lu fetu sintemu.
E cu c'agghiorna a campari dumani,
Sa quantu casi si viri e si senti
E la solita giustizia di la genti.

Siscilia mia terra profumata
Specchiu di li biddizzi chiù mpurtanti
Di l'universu nteru si la Fata
Pi li tò preggi mistiriusi ncanti.
Rigina si du scelu terra e mari
Ma spissu nni fai chiangiri e trimari.

Stu terremo tu fu veru strazianti
Di lutti di masceri e di spaventi.
Curri lu munnu a li tò peri ansanti
Purtannu aiutu, viviri e ndumenti.
Siscilia mia ringrazia e statti queta
Fa riturnari a la tò genti leta.

C'ancora curri senza chi si vota
Purtannu sempri appressu ddu buatu
Di sti paisi strutti nda na vota
Chi cu li guerri nun s'avia avviratu.
Siscilia mia è comu nna priera
Ridunani la pasci e a primavera.

E li scossi chi ci foru a Gibbellina,
Foru chiù forti e di nna forma strana.
Ma a li tri e quattru di matina
Trema la terra è comu na gran frana
Sutta li peri nostri assai si ntisi
E distrutti foru sti paisi.

Santa Marghirita e Munti
Vau Salaparuta alla tu Gibellina,
Ammenu natri resci ni liniau
E sempri scossi di sira e matina.
Povira genti distrutta dda annata
Ntra scoli e tenni ammunziddata.

E prima chi minnì di Gibellina,
Lu scimiteru ivi a visitari.
Era nna matinata d'acquazzina
E di negghia chi paria scurari.
Ma la cosa chiù tinta e mpressionanti
Fu quannu c'arrivai ravanti,

Un tabbutu quasi scummigghiatu,
Chi quasi quasi cariri paria
Picchì lu muru sinnavia calatu
E mentri certi lapidi liggia
Per mano assassina quì riposa
Mi parsi ntisi ma viri nna cosa.

Mi votu nun c'è nuddu e sentu riri
Picchì tu provi tuttu stu scunfortu?
Lu munnu troppu si diverti e riri
Ma cu stu ventu un si ci arriva mportu.
Nun c'è chiù dignità ne canuscenza
Nun si distingui pampini e simenza.

Stu terremotu è comu nna risata
Rimpettu a chiddu chi si meritassi.
Fin'anche la natura n'è sdignata,
E siddu a subbissari s'arrivassi
Sulu accussì capiri si putissi
Cu a stari ncapu a terra cià sapissi.

E nun ti mpressionari s'accomora
Senti parlari e nfacci a nuddu viri
Scantati di chiddi chi su fora
E all'apparenza beddi in vista viri.
Ricordati chi fui lu conti Luna
Chi detti aiutu e pasci ogni pirsuna.

Però di tuttu chistu n'accanzai,
La morti, un trarimentu oscuru oscuru.
Ora vattinni e un ti scurdari mai
Chi l'omu onestu sbatti a testa ammuru
E penza puru chi ndo scimeteru
Truvasti l'amicu chiù sinceru.