MINIPRUCESSU

Illustri Pisirenti
chi bboli chi ci ha' a ddiri ?
Chi jò sugnu 'nuccenti
l'avissivu a capiri !
'Sta mafia chi cos'è?
Lu sannu i giurnalisti
li jurici viré
e poi li cumunisti
picch'iddi la 'nvintaru
cu granni fantasia
e poi ci specularu :
viv'a dimocrazia!
Pigghiaru quattru fissa
cu coppula e scupetta
inveci di ministra
e genti d'etichetta!
Li latri stannu a Roma
'un sunnu cca 'mputati
hannu lauri e diploma
e sunnu debbutati !
Scrivissi Cancilleri
la vita mia qual'esti :
nascivi sutt'e' peri,
sutt'e' peri di vestj !
Di quannu avia sett'anni
tutti li santi jorna;
staciuni e 'mmernu ranni
e' cincu appena agghiorna
a munciri l'armali
e poi, dopu lu fruttu,
senza scarpi o stivali
sia cu lu tempu asciuttu
o quannu a nivicari
cumincia e lu cappottu
nun ci servi a quariari
a cu è di friddu mortu,
a pasciri l'armali
finu all'annu trentottu !
'u lettu 'u canuscivi
quannu fici 'u surdatu
a vint'anni partivi
gnurantazzu 'mbranatu !
E 'Merica mi passi
li vita militari,
sazzai puru li spassi
e mi potti saziari !
A scriviri 'mparai
cunsunanti e vucali
e mi perfezionai
a leggiri 'u giurnali :
« Latri demucristiani,
scannali sucialisti,
'mbrogghi repubblicani,
tentativi golpisti !
Verri, rivoluzzioni,
sciopiri, terrorismi
ruvina di nazioni
e tanti cosi in ismi.
Ebbrei, niuri e slavi
e sud americani
trattati comu schiavi
di li genti cristiani! »
E jò chi fici mai?
Nna tantu mari magnu
quarchi mira spustai
mi fici quarchi bagnu,
propriu 'na caccia d'acqua
tanticchia di rinfriscu
mentri chi cci scialacqua
lu preti cu lu viscu !
La terra a cu 'a travagghia
e jò la travagghiava
mi misi quarchi magghia
chi di friddu trimava !
Lu baruni era stancu
di fimmini e sciampagna
tinia di notti bancu,
trascurava 'a campagna,
e jò ci faticava,
mentr'u baruni Alagna
a tavulu spacchiava
la rennita di Spagna!
P'un debbitu d'anuri
chi cei pacai 'n cuntanti
iddu mi reti un ciuri :
la terra di Giacanti !
E puru la cuntissa,
bonarma da signura
chi merita 'na missa
appi di mia gran cura;
mi retti 'a paricchiata
ed ancora mi rura
chi l'haiu cultivata
cu tutti li surura !
e petra supra petra
appi 'na posizzioni
di chiddu ch'unn arretra
in ogni situazzioni.
Si fici quarchi erruri
poi lu pacaj 'n calera
passannu jorna duri
chi peggiu nun ci nn'era' !
La 'mmiria l'appi 'n coddu
già di li primi passi
chi mi jccaru a moddu
li ricchi cu li scarsi;
si detti quarchi botta
centu jò nn'abbuscai
chi la vita è 'na lotta
e jò la praticai !
Pallamu di 'sta droga;
lu viziu di sturienti !
D'eroina e di coca
'unni capisciu nenti,
ma chiddi ch'a purtaru
su' veri dilinquenti;
a tutti s'accattaru,
illustri Pisirenti !
Cu fici risistenza
ci appizzau la peddi
o persi cunsistenza
e munci ciaraveddi !
Chi munnu stracanciatu
chi granni cosi tinti,
jò sugnu carciaratu
pi li reati estinti
di quarchi abbiggeatu
di cincu oppuru novi
viteddi ch'aiu 'rrubbatu
e ch'un n'aviti provi!
L'aviti cu l'agneddi,
ma poi nun li 'mputati
le veri rei marreddi;
ministra e debbutati
chi fannu granni affari
e semu carciarati
sulu 'i pecciapagghiari
e chiddi scaccinati !