ADDIU VECCHIU PARTITU

Addiu vecchiu partitu,
parti tu di l'onesti,
di lotti e di cuvernu
comu ti ruvinau
'stu metudu mudernu!
Lu votu ora s'accatta
lu votu ora si vinni
« E' tantu ! S'un t'appatta
allargati, vattinni
cu ttia 'un ci votu cchiù ! »
E l'assessuri Prina
chi va vinnennu voti
a tantu la duzzina
già s'accattau lu jottu !
E l'assessuri Spilla
'nna setti sarmi d'ortu
si fabbricau la villa,
p'un diri chi Lubiancu
si fici lu palazzu
cu la piscina a ciancu !
E tu vecchiu cumpagnu
'n mezzu 'sta gran cagnara
'n mezzu 'stu marimagnu
ti fai la vucca amara
e sputi 'nna lu bagnu
ch'un ti cci attrovi cchiù !