Ch'emu a fari cu 'sta puzza chi nn'ammorva 'sta cità,
cu 'sti testi di cucuzza propriu senza abbilità ?
Chi su' sempri 'nfattariati
a risolviri probblemi
di li so' raccumannati insensibbili e' bistemi
di li tanti chi 'ncazzati
pi 'stu schifu chi n'abbunna nne' vaneddi e nna li strati su' dici si a falla tunna ? !
E lu sinnacu Avugghiaru, beddu lisciu e 'n cravattatu cu gran stili marinaru
quannu ch'esti 'ntervistatu 'nno salottu chiddu bbonu cu distaccu calculatu
chi ti pari ch'esti all'O.N.U., fa capiri ch'un ci ha statu
e 'n sustanza chi la puzza iddu propriu nun la senti,
si quarcunu poi lu truzza iddu fa l'indifferenti
o rirennuti ti fa :
Esti puzza dimocratica chi si chiama libbirtà !
E ch'è chista ormai la pratica di la nostra civiltà!
Chi s' acchiana l'Oscarmanzu
pulizzia forsi farà,
ma t'immaggini lu lanzu poi pi tutta la cità ! ?
E facennu l'occhiu ganzu ti saluta e si nni va !
|