Comu l'unna di lu mari
turmintata di lu ventu
Diu ! mi tocca di piniari
senza paci e senza abbentu !
Era a Roma; corruzzioni
lagnusia e 'nquinamentu,
lu schifìu di la nazzioni,
sarvu quarchi monumentu !
A Milanu; dicisioni,
tuttu prontu 'n on momentu,
ma cchiossài speculazzioni
e, poi, scarsu sintimentu !
Mentri a Napuli eruzzioni,
cunfusioni e gran scuntentu
chi ti runanu emozzioni:
l'emozzioni d'un momentu !
A Palermu; malazzioni,
luttu, spasciu e trarimentu
puru rintra la Reggioni :
nna ' ddu vecchiu monumentu !
Cercu paci, cercu queti,
ma nun trovu chi probblemi
genti stanchi, genti squeti
e chi' jeccanu bistemi !
E magnacci e spacciatura
e drugati e fimminelli,
latri e poi speculatura
e su' nenti li spinelli !
Chi successi a 'stu paìsi ?
Chi si fici 'miricanu ?
o teréscu oppuru 'gnisi ?
Iddu 'unn esti cchiù 'talianu
mancu cchiù nno paisaggiu:
l'Adriàticu; 'na chiavica,
l'Asprumunti; cchiù sarvaggiu,
la Sicilia comu l'Africa,
la Padània avvilinata,
la muntagna si sfarina,
la cullina abbannunata
e mai nuddu si rimina
pi sarvari 'sta cuntrata !
|
e-mail -
