LA CASA DI ME NANNU

Era anticulidda sta casuzza
ma mi paria tantu bidduzza,
c’eranu finistreddi p’affacciari
e porti stritti cu li firriggiari.
Nna cammara - lettu a dui cunzatu
e tuttu fattu di ferru battutu:
avia du’ puma lustri di ramu,
stu lettu era fattu tuttu a manu.

Supra la culunnetta c’era un lumi
supra lu lettu un beddu pavigghiuni,
nna pocu di seggi misi a filera,
nna cascia, un cantaranu e vacilera.
Tannu avianu fora la cuperta,
un capitanu misu sempri all’erta
pi lu bisognu sempri priparatu
cu nna tuvagghedda accuppunatu.

Ntra la saletta c’era un beddu specchiu
tuttu macchiatu picchì era iuntu vecchiu,
nna tuvagghiedda bianca di linissa
nna minzulidda cu la pittinissa.
Darrè la porta appizzata la robba.
Li seggi eranu cu funna di corda,
a muru scutiddaru cu li piatta.
mmezzu la casa misa la buffetta.

Ntra la cucinedda c’era un cufularu,
supra lu cufularu c’era un quararu;
nna canniledda sempri priparata
supra n’anguliddu bedda pusata.
Pusati a mmuru li cosi nicissari,
nna tavulidda puru pi manciari,
e sutta la tavulidda un casciuneddu
pi mettici li pusati e lu cuteddu.

Nna pilicedda supra un peri di lignu
sirvia pi lavari e farisi lu bagnu,
la cinniredda misa a culari
chi poi nni sirvia pi lavari.
C’eranu marunazza di crita,
ma dda casa era sempri pulita.
Cu la scupitta me’ nanna stricava
e dda casuzza vecchia ciauriava.

Sta casa vicchiaredda di me’ nannu
iu spissu la notti mi la sonnu.
E sarà chi provu sta gran nustalgia
picchì era la casa dunni crisceru a mia.