COMU SI NASCI ACCUSSI’ SI MORI

Tuttu chiddu ch’asisti nnu criatu ‘unnasci s’unn’è statu siminatu, nascemu pi amari e pi gudiri nascemu pi suffriri e poi muriri. C’è cu nasci cu la cammisedda e sona puru la so campanedda; la furtuna è paci e puru la saluti: campari vecchi e gòrisi i niputi. Di la morti n’amu a fari curaggiu picchì cca semu aceddi di passaggiu, cu è riccu lassa beni e lassa sordi cu è scarsu lassa sulu li ricordi. Ninn’jemu senza scrusciu, zitti e muti, lassamu li figghioli e li niputi, lassalli nni fa mali assai lu cori, comu si nasci accussì si mori.