|
Trapani mia di li setti biddizzi
cuntu la storia di comu tu nascisti
d’acqua ri mari su li tò beddi trizzi
e di robbi assai priziusi ti vististi.
Quannu li Elimi vinniru a duminari
pi prima cosa ficiru li turri,
cu fangu e petri si misiru a fabbricari
na sta terra chi ntra lu mari scurri.
Sciarri e dumini ni subisti tanti,
facianu focu di supra la muntagna
e s’ammazzavanu sti facci di briganti
pi conquistari a ttia e la campagna
Capi e re di tutti li banneri
si ficiru di tia la proprietà,
foru iddi chi ti misiru mperi
e ti lassaru na bedda eredità.
Baruni e conti di grandi signuria
ficiru palazzi, chesi e cummenti,
bagghiura e feura dda mpirifiria.
Pi via di mari cu bastimenti a vela
lu ventu li purtava ntra lu portu
ricchi mircanti di oru sita o tila
e a lu spàrtiri ci scappava lu mortu.
Manu manu fusti poi abitata
di salinara, piscatura e artigianati,
di li trapanisi stessi già pupulata
e d’aggenti di maestranza rinumati.
Sti omini di granni sintimentu
pinsaru poi a fari li Misteri:
di Trapani sunnu un gran purtentu
annacati di popolu e ricatteri.
Tutta lucenti di munzidduzza sali,
di madriperla è la curuna
e tantu ricca di curaddu d’ammari
pi la Sicilia dea di furtuna.
Liggemu ntra li libbra di la storia
tanti fiuri e tistimunianzi antichi
chi la città finia a la Ranova
stampata ntra quadri di muddichi.
La Loggia è lu centru di lu tò cori
e tantu originali li tò strati
quannu sbuccava l’acqua di lu mari
lavava sti stratuzzi abbalatati.
Di latu a latu mura pi furtezza
ntra l’archi li granni porti misi;
la sira si chiuriano ‘nsicurezza
vecchi e picciotti dintra lu paisi.
Camminavamu cu li fanali nmanu
poi l’appizzavanu a ogni angulu di muru,
l’addumava cu la miccia lu zu Cianu
la sira prima di fari scuru.
A la Iurecca c’è la turri,
la notti addumavanu a lampara
facianu signalazioni a l’autri turri
e puru a chidda di la Culummara.
Saturnu, vicaria e biblioteca
ntra la strada allatu da marina
li tavirnara cu la sò botteca
rapianu all’arba ogni matina.
S’arruspigghiava Trapani ncantannu
d’abbanniatura cu li carrittedda,
cu stu gran tiatru chi facianu tannu
la cittati si facia cchiù bedda.
Li strati nun l’àiu ditti tutti,
parlai di chiddi cchiù cintrali:
portanu nomi di genti illustri.
C’era puru a lu centru lu spitali.
Ntra la Chesa ranni d’Annunziata
l’abbiviratura davanti la sò porta
pi li muli e li passanti di la strata
acqua di muntagna chi cunforta.
Tannu era tuttu maggi e siniazzi
’nfina dunni chi c’è lu munumentu
ora peri peri ci su’ li machinazzi
chi traffichianu ’ncapu lu cimentu.
La guerra lu beddu tiatru dirrupau
e canciau la tò bedda facciuzza,
di fallu arrè nuddu cchiù ci pinzau
e nun ridiu cchiù la tò vuccuzza.
Lu addu canta n’ ’tra campagna
scinneru li corvi da muntagna.
Tutti sti cosi acclamanu puisia
di Trapani antica e sempri mia.
|
e-mail -