MPARI TURI, FACITIMI LU FAVURI:
SCRIVITIMI NNA LITTRA PI L’AMERICA

Caru Pippineddu, figghiu miu,
avi quasi vint’anni c’ ’un ti viu,
lu me’ cori pi ttia tantu brama:
l’arma sta mpena quannu ama.

La matri, sugnu iunta vicchiaredda,
l’occhi parinu funtanedda,
sacciu chi facisti gran furtuna
satannu ciuma e puru li vadduna.

Mi mannasti lu grammofunu
e li sordi, ti ringraziu,
la vuci tò si spanni a Munti Cofanu,
si carma ntra lu cori lu me’ straziu.

Ma sì luntanu e abbentu iu nunn’aiu,
nchesa vannu a Diu li prieri
di scansariti saluti d’ogni guaiu
e si càriri ài, di stari sempri mperi.

Quannu la sira mi vàiu a curcari,
strinciu la tò foto a lu me’ pettu
dicennu a ttia li ducizzi rari
comu quannu ti curcava nto me’ lettu

e preu lu Signuri e puru a ttia
di viriti prima di la morti mia.