PACECO

Tant’anni fa di tia mi ’nammurai.

A lu primu toccu di campana
Pacecu di lu suli sì vasata;
arraccamata porti la suttana
nta na cullina bedda stinnigghiata.

Pupulata d’agenti rispittusi,
mpiazza assittati tanti vicchiareddi
all’aria aperta, pi nun stari nchiusi
pi sentiri lu cantu di l’aceddi.

Mputiri di la verra ci fui sfullata,
ja accattari lu latti ogni matina,
m’assittava nta dda scalunata
chi mi paria lu tronu da rigina.

Passavanu carretti cu ristuccia
e carritteddi chini di miluna,
lu zu Cicciu ntrattinia a “musuccia»
pi dari miluneddi a li azzuna.

Di fumalori di li vecchi casi
che ciavuru chi scia di pani friscu,
iu nun capia boni li sò frasi,
li strati fatti tutti di pitriscu.

A ghinghiri l’acqua ìanu dda gghiusu
dunni chi c’era la biviratura
ognunu chi di cauru era cunfusu
s’arrichiava cu dda gran friscura.

Tutti si cosi cu l’avia mai vistu!
si nun m’avia arrassata du paisi,
jardina chini di tantu fruttu mistu
e l’omini sbrazzati li cammisi.
A la Maronna tannu fici lu vutu:
si campu mi maritu un pacicotu.