Terza parte - Lavori in itinere

“Zammatiari...”

Nuddu cumprenni lu me bonu stari
quannu nchiusu nta sta ‘gnuni ncantata
mi mettu di bon cori a zammatiari
stannu applicatu tutta la jurnata.

Pi studiu, pi travagghiu o pi babbiari
lu tempu passa, pari na vulata,
spissu mi scordu puru di manciari
e staiu a picu finu a la scurata!

Chi fazzu? Scrivu tantu ‘n-versi e ‘n-prosa
mittennu ‘n-carta zoccu vidu e sentu
zoccu m’ispira la me bedda Musa…

E dugnu arènzia a st’arma murritusa
chi jornu e notti senza nuddu abbentu
si scanna di travagghiu e ‘un s’arriposa!