Terza parte - Lavori in itinere

Ed ancora un saggio di poesia popolareggiante con…

“Lu scherzu di lu fatu”

Ninu Basiricò chiamatu “Attu”
vui lu sapiti ch’è ‘n-pezzu di pani,
però ‘un capisciu comu va lu fattu
chi nta sti jorna scura cu li cani
e so mugghieri spissu ci rinfaccia:
«Ci curpa ss’apirtura di la caccia!»

‘Nfatti la caccia è lu so turmentu,
lu guaiu, però, è ca ‘un si nn’adduna,
iddu la pigghia pi divirtimentu
e, ‘ntantu, è un rumpimentu di buttuna
pirchì, pi jiri appressu a li cunigghi,
si scorda di la mogghi e di li figghi!

Pi chiù d’un misi jiu tampasiannu
nta ssi custuna di Casteddammari
comu ‘n-furettu quannu va naschiannu
e nn’agghiuttìu assa’ vuccun’amari…
Spissu s’arricugghìa senza ciatu
dicennu ca truvau tuttu fuchiatu!

Sabatu notti ntra jelu e sirenu
lu “Jattu” va a la “posta” e dda si scura
‘nzem’a l’amicu so Cicciu Florenu
ca nun ha persu mai nudda apirtura:
amici pi la peddi comu sunnu
ca picca nni truvati nta lu munnu!

E ancora prima di lu primu arburi
a tutti banni si ‘ntisi sparari
e Ninu e Cicciu ch’eranu sicuri
tutti l’armali vìttiru passari:
surci, attazzi niuri e vurpuni,
ma di cunigghi ristaru a dijuni!

S’arricugghieru nta la matinata
cu cincu cunigghia dintra la sacchina,
forsi rigalu d’una certa fata
ca un tempu la chiamavanu Turchina…
e cu li voli mettiri a la prova
dumanna a Dinu Grassu… si lu trova!

Ninu Peralta e Cicciu Polisanu
chi ‘a Napula pi caccia sunnu ntisi,
cu li cunigghia nta lu tascapanu
s’arricugghieru puru a lu paisi…
Però, in virità, nun mi cunvincu
ca puru iddi nni pigghiaru cincu!

Cincu Cracchiolu e Petru Tunisinu,
cincu li frati Gencu pari pari…
Si chissu ‘un è lu scherzu d’’u distinu
mi lu diciti vui zoccu aiu a pinzari?...
Ca ‘i fati ‘n-celu ficiru radunu
e sparteru li cunigghi a cincu l’unu?

Avìa ragiuni Campu ‘u mulinaru
ca pi sfurtuna nni pigghiau tri
li fati certamenti si sbagghiaru
siddu li cosi stannu d’accussì…
‘N-giru si rici ca lu Prisidenti
sì pigghia tri cunigghi ‘un cunta nenti!

Ma si ‘u distinu fu assai rifardu
cu certi cacciaturi di valìa,
ci curpa patri Paulu Gucciardu
pirchì, in virità, criditi a mia,
essennu nta lu lettu raffriddatu
ci cumminau stu sherzu di la fatu!