SCIAMPAGNUNARII
Poesie spassose e scherzose, in allegria insieme ad altri
poeti, adattandoli per l’occasione. Raccolte e mai pub-
blicate, recitate molto raramente.
A seguire una anticipazione che val la pena di leggere,
anche perché consente di scoprire un Lumia capace pure
di far sorridere, presentando un quadretto di paese in cui
regnano pace, armonia, ricchezza e salute. Apparente-
mente un paese sano, giusto e timorato di Dio. Finchè
tutti non perdono la parola e l’allegria. Cosa che succe-
de quando “ognunu sappi d’essiri curnutu!”…
“La sciddicata…”
Nta un beddu paiseddu di campagna
rignava vera paci ed armunìa.
Parìa lu paisi di la cuccagna
pirchì la puvirtà nun esistìa…
Lu medicu cundottu e lu spiziali
lu populu curava d’ogni mali…
Lu Sinnacu, daveru acculturatu,
amministrava mittennu tutti ’n-fila.
Difatti nun truvavi un disoccupatu
mancu si lu circavi cu la cannila,
e ’n-ogni casa c’era ’n-virità
tanta abbunnanza e gran filicità.
Lu populu, quasi tuttu, era cridenti,
currìa ad ogni sonu di campana,
lu parracu pi chissu era cuntenti
e pridicava cu na vuci arcana…
Ma si pinzati ca lu cuntu torna
sbagghiati… pirchì c’eranu li corna!
Nfatti don Petru, prima di la missa,
pirdìa menza jurnata a cunfissari
pi tutti l’assoluzioni era la stissa:
- Vattinni ‘n-paci e chiù nun sciddicari… -
Pirchì tra d’iddi ssa gran vastasata
ristava accussì ntisa: sciddicata.
Ma ‘n-jornu pi castìu di lu Signuri,
Mentri don Petru a caccia si nni jiu,
Nzemi a Spiziali, Sinnacu e Assissuri,
pi sbagghiu, un corpu ‘n-frunti ricivìu
e morsi, mischineddu, su l’istanti
pi curpa d’un distinu stravacanti!
Ci fu luttu, duluri e cundoglianzi,
ma doppu ricuminciau l’alligrìa,
tintu cu morsi e perdi li sustanzi,
cuntinua la vita la so via…
Nfatti lu misi mancu avìa finutu,
ca sùbitu arrivau lu sustitutu.
Beddu, cu l’occhi sperti, sicculiddu,
si fici sèntiri a la prima missa,
tutti l’occhi puntati supra d’iddu…
E quannu na vuci dissi: - nun è fissa -
nàutra murumurau: - ssu parrinu
è picciriddu, ma nun è cretinu! -
Nfatti, doppu la terza cunfissioni,
jittau un pugnu supra un tavuluni
dicennu: - chiù nun dugnu assoluzioni
si prima nun aggiustanu ‘u stratuni!... -
Pirchì pinzava chi dda sciddicata
finìa s’aggiustavanu la strata!
E nzemi a tutti li soi parrucchiani
dicisi di occupari lu Comuni,
dicennu a ddu cunsigghiu di cristiani:
- Nun mi lassati comu un babbasuni,
comu putiti stari surdi e muti
sapennu chi c’è di ‘n-menzu la saluti? -
Poi dissi all’Assissuri ntirissatu
di mèttisi na manu nta lu pettu,
pirchì, pi cuntu d’iddu, era piccatu
siddu nun riparava ddu difettu…
E quannu ca finìu ssa spatuliata,
scuppiau na grannissima risata!
Lu parrinu nun digirìu l’affruntu,
a lu Sinnacu dissi amaru amaru:
- quannu mi mpegnu sempi ci la spuntu,
ascùtami gran pezzu di sumaru,
ma to muggheri nun ti cunfidau
quantu voti sta simana sciddicau?
E tu, caru e illustrissimu Assissuri,
ca sèntiri nun voi la me vuci
vulissi ca ti parrassi lu Signuri
e ti dicissi di supra la cruci
quantu voti to soru ha sciddicatu
pi curpa d’’u stratuni spirtusatu!
E tu, caru dutturi, chi ci riri?
Pirchì nun lu dumanni a to mugghieri
ca sciddica ogni jornu pirchì ‘un viri
lu chiddu chi si trova peri peri?
Siddu vuliti beni ‘a vostra spusa
è megghiu chi attuppati ssi pirtusa!
Macari la figghia di lu Spiziali,
sciddicau quattru voti sta matina,
e quarchi vota scoppa a lu spitali
rumpennusi la coscia o la carina…
Zoccu aspittati chi quarcunu mori?
Mancu si ci vulissiru trisori!
L’aula abbannunaru su l’istanti
ad unu ad unu tutti li prisenti,
ognunu bistimiava li soi santi
capennu lu baccagghiu, finalmenti…
Nuddu ridìa chiù, e mutu mutu,
ognunu sappi d’essiri curnutu!
Passaru l’anni e tuttu fu scurdatu,
ddu picculu Cumuni è na cità,
lu populu ora è tuttu addutturatu,
la donna cunquistau la parità…
Ma puru si ora l’ebbica è canciata
si sciddica lu stissu strata strata.
E vistu chi scassarunu li strati
pi mèttiri lu gassi citatinu,
li fimmineddi, schetti e maritati,
pigghiaru un ternu siccu a lu putinu…
Difatti, nuddu li po cinsurari
si càpita, pi sbagghiu, sciddicari!
|
e-mail -
