Terza parte - Lavori in itinere

CIUSCHI E PALICHI

Poesie con dedica ad amici, per ricorrenze (matrimoni, ‘spiticchi’) o sui libri regalati.
Screzi e sorrisi in festa. Apprezzati dalla gente forse più che le poesie dette “serie”.
Da “Ciuschi e palichi”

“Discursi cu la sorti”

Chiù di vint’anni stesi a travagghiari
jittatu strata strata a la campìa
e suppurtavi, senza pipitiari,
li chiova di Picciurru e di Garcìa.
E pi canciari stu me tristu statu
sturiavi e divintavi diplumatu.

Lu fruttu di ssi peni e di ssi stenti
lu prisintavi ‘n-jornu ‘n-società,
ma vi lu giuru, nun successi nenti,
fui trattatu comu un baccalà.
Canciau lu Diritturi e lu P.O.
però la sorti nun canciò!

Spostu a l’acqua lu friddu e lu ventu
o sutta lu suli quannu chi caliava
Strincìa li renti senza mai ‘n-lamentu
e mutu mutu tuttu suppurtava.
Di la matina finu a la scurata
sempi prisenti ddà ‘n-menzu la strata!

Comu ‘n-sceccu misu a l’antu
travagghiavi comu ‘n-pazzu
e nun cuntu chiù di tantu
pi nun fari pruvulazzu…
m’accanzavi cu disgustu
sulu fumu e nenti arrustu!

Vitti passari avanti a cera leta
tanti “minchiuna” assai raccumannati
e nta ssu menzu quarchi analfabeta
cu lu cunsensu di li sindacati!...
A la scurata pinzaru puru a mia,
mi ficiru “’mpiatu” nta lu “CLIA!”

Ssi cosi jia dicennu a la me sorti
un jornu chi la vitti pi ‘n-mumentu,
ma idda mi taliau cu l’occhi storti
chi quasi quasi morsi di spaventu
e cu na vuci aspra e priputenti:
«ammatula - mi rissi - ti lamenti!

Scrivitilli nta la mpigna
e ricorda sti palori,
a cu’ m’avi pi matrigna
sunnu vani studi e scoli…
tu si malu prsuasu
scordatillu lu Parnasu!

Lu jornu chi ti ficiru “’mpiatu”
successi pirchì tannu ju durmìa
ti poi cunsidirari furtunatu
nun ci pinzari chiù Vitu Lumia
pirchì siddu eru svigghia a ogni costu
ora nun ti truvassi nta sst postu!

Nun sfardari lu distinu
loccu babbu e prisintuusu
ju bloccai lu to caminu
cu na chiavi pronta a l’usu…
e siddu nun lu sai, ju pi tia
aiu pruvatu sempi antipatìa!»

Capennu lu baccagghiu, finalmente,
mi la pigghiavi cu filosofìa
ci rispunnivi comu fussi nenti
quasi cu garbu, comu piaci a mia,
ci rissi: - Mi permetti na dumanna,
lu sai chi travagghiu a natra banna? -

Usau la lingua comu fussi spata
pi renniri murtali la firita
e cunchiurìu, sempi chiù ‘ncazzata:
«nun hai caputu nenti di sta vita,
stavota nun ci potti, ‘n-virità,
pirchì c’era l’assensu di la Società.

Ma ’un ti futtiri la testa
chissa è l’urtima vittoria
d’ora in poi finìu la festa
si cunchiuri la to storia.
Senza preu né attenzioni
finu a ’u jornu d’a pinzioni!»

Ci dissi: - Ma chi mbrogghi? Nun mi nganni,
pi mia tu stai cuntannu bummulati,
nun sai chi c’è la festa di trent’anni
e ju sugnu tra li festeggiati?
Stavota ti lu giuru ‘n-facci a Diu,
si mi sconzi ssu jocu mi siddiu!

Ssu jornu, pi mia, è assai particolari
jornu di festa, di paci e d’armunìa,
ti pregu, sorti, nun l’avvilinari
cu lu vilenu di l’ipocrisìa!...
Lu voi un cunsigghiu? Fatti na durmuta
‘cussì diventi orva, surda e muta! -

Basta!... - cu vuci ferma mi rispusi:
… nun pozzu chiù cummattiri cu tia…
e doppu cu palori vilinusi:
… ti mannu na gran tinta malatìa
‘cussì ‘n-tempu ri nenti, senza dubbi,
perdi lu sceccu e puru li carrubbi!

Tintu cu’ avi na mala ‘ntinzioni
‘n-tempu di ‘n-annu già mi ntisi mali
subbivi na dilicata operazioni
pi chiù di ‘n-misi jittatu a lu spitali.
La me sorti mantinni la palora…
ma vosi puru chi campassi ancora!

E campu ‘nfatti… però malucampatu
liccannumi ogni jornu la firita
un misi bonu e nautru malatu
sazzu lu duci-amaru di sta vita!...
- E’ megghiu - ntantu dicu e mi cunortu
- un sceccu vivu chi ‘n-cavaddu mortu! -