CUNTI E CANTI
Si tratta di una trentina di racconti (da 3 a 10 pagine ciascuno) e di poesie-canti non musicati, ma che potrebbero
esserlo considerata la predisposizione naturale.
Anticipiamo
“L’addimannuni”
“Ricordu ca quannu eru picciriddu eru vivulu, spertu e murritusu chiù di la giusta misura, un pipispezi chi Diu
ni scanzi!
Quannu avìa deci anni currìa l’annu 1950 e nta ssi paisi un vecchiu addimannuni tanticchiedda strammu, almenu
d’accussì parìa e prima vista. Ma nun era sulu l’aspettu ca mi spincìa a pinzalla nta ssu modu, era soprattuttu pi
comu si muvìa, pi comu si cumpurtava cu granni e picciriddi e pi chiddu ca, ‘n-certi mumenti, ci niscìa di mmucca.
Cu tuttu chissu nun staiu facennu lu sputa sintenzi, è chiaru ca lu miu nun è certu vangelu di Diu, anzi ammettu,
senza scrupuliarimi tantu e senza tanti vavi, ca potti pigghiari cannileddi di picuraru pi lanterni.
Comu dittu supra, anchi siddu era a sufficienza vispu e gniffu pi quantu si voli, nsumma un beddu cocciu di piru
capaci di pittari ’n-aceddu ntamentri vulava, nun di menu era troppu nicu pi putiri giudicari cu lu giustu sennu
e po dàrisi puru ca la mia potti essiri sulu na mala mprissioni, tant’è ca tannu lu cunsidiravu un vecchiu
addimannuni, ma ntantu c’era cu dicìa chi avìa appena appena suspiratu la cinquantina.
Sulu cu l’occhi e la menti di un picciriddu si po cunsidirari vecchiu un omu di cinquant’anni e, sicuramenti, jucau
a sfavuri di ssu sbinturatu lu fattu ca jia malu vistutu, cu la varva longa e tuttu spittinatu.
Era vasciu di statura, lariu di facci e menzu sgangulatu e, pi cucucciu, avìa na caminatura accussì lesta ca parìa
chi fussi di na nuvula di vespi assicutatu.
Nta la bona staciuni jia vistutu lèggiu: na cammisa quatrittata supra lu russu, un paru di causi di ntoccu, na sacchina
di cannavazzu a tracolla e na coppula sdiciurata ca nun si mittìa mai ‘n-testa pirchì ci sirvìa p’apparalla davanti
a li pirsuni quannu addumannava quarchi lira di limòsina”…
|
e-mail -
