Terza parte - Lavori in itinere
Una Grammatica Siciliana cominciata 40 anni fa:

LA NOSTRA GRAMMATICA SICILIANA

Lingua, linguaggiu, formazioni di lu discursu.
La lingua è lu cumplessu di li palori, di li locuzioni, di li frasi ca tuttu un populu usa, nta lu stissu tempu, pi cumunicari pinzeri e sintimenti:

Es.: (la lingua ‘taliana, la lingua francisi, la lingua spagnola, la lingua russa, la lingua greca, la lingua araba ecc.)

Lu linguaggiu, nveci, avi un significatu chiù genèricu di lingua: cumprenni tutti li modi pussibili di palisari un cuncettu o un sintimentu:

Es.: (lu linguaggiu di li muti, chiddu di l’occhi, chiddu di la musica, chiddu di l’armali, ecc.)

Annunca ricurdàtivi chi la lingua è menu genèricu di linguaggiu.

A li nostri jorna, li linguaggi usati di tutta l’umanità chi abita lu pianeta Terra sunnu migghiara… (ma si ponnu spàrtiri in novi granni gruppi)
Lu gruppu unni è inclusu lu Sicilianu, è chiddu Indueuropeu chi cumprenni nàutri ottu suttagruppi di lingui:
Arianu o Indu-iranicu (Sànscritu; Persianu anticu; Hindi; Urdu; Sindhi; lingui Curdi…); Armenu;
Baltu-Slavu (Lituanu; Russu; Polaccu; Boemu; Serbu…); Albanisi; Grecu;
Italicu [Umbru; Oscu-Sabellicu; Siculu; Latinu (di unni discinninu tutti li lingui chiamati neulatini: Francisi; Spagnolu; Portughisi...cumprisu lu Talianu cu tutti li soi dialetti)];
Celticu (Gallicu; Britannicu anticu; Irlandisi…);
Germanicu (Goticu; Svidisi; Danisi; Nurvigisi; Tedescu; Anglusassuni…).
E tutti, chiù o menu, si sèrvinu di gesti, di signi, di soni, di palori, di locuzioni pi palisari e scanciarisi pinzeri e sintimenti.
La lingua, sicuramenti, oltricchì essiri l’elementu principali e nicissariu ‘n-tutti li rilazioni di la vita d’ogni jornu, è priziusu strumentu pi palisari e fissari, pi menzu di la scrittura, tuttu chiddu chi pinzamu e sintemu.