Seconda parte
Opere già pubblicate

“Paladinu”

Di nicu nicu all’òpira ‘e pupi
mi divirtìa un munnu nnamuratu
d’Orlandu, di Rinaldu e re Artù.
Specialmenti quannu ‘n paladinu
luttava cu fururi a tu pi tu
contru quarchi firoci saracinu…
E certi voti daveru ncazzatu
strincìa li renti e propriu cu sti manu
gridannu: - vili e bruttu maganzisi -
vulìa affucari lu trarituri Ganu!
… Avi di tannu, bonu nsusizzatu
di ssi principi di sana giustizia,
chi pigghiu li difisi
di cu’ tra milli stenti
campa senza campari trivuliannu
pi jìnchiri la panza a li putenti!
Avi di tannu chi fàbbricu fantasimi
e chi ammunzeddu sonnura di pagghia…
Armatu sulu di lu me curaggiu
senza spata né scudu né curazza
vucìu comu ‘n-dannatu
Contru la mala-razza:
mafiusi e traffichini…
E parru di uguaglianza,
ma chiddi c’hannu li sacchetti chini
ascutanu… e cu tanta crianza
macari si speddanu li manu…
po’ discurrennu cu lu so vicinu
ognunu ridi e dici: - paladinu! -