“Koinè”

Tu mi nzignasti lu beddu parrari
(la bona e duci lingua di li nanni)
e mi nzignasti a scriviri macari
la lingua di lu ddì a quarant’anni.
Vali un trisoru e nun si po pagari
la ntrìsica virtù chi spenni e spanni
pi chiddi c’hannu vogghia di mparari
si' comu un faru, si' na cosa granni!
Appena canuscivi l’abbiccì
pi mia già fusti chiaccu e calamita
mi nnamurai di tia, fu na simbiosi!
Iu ti ni sugnu gratu e sai pirchì?
Pirchì mi dasti luci nta sta vita
ed ora sacciu tanti beddi cosi!