Sicilia sugnu… e quannu mi viditi
vistuta cu li robbi di la festa
sgranati l’occhi quantu vui putiti:
Sapiddu chi vi passa pi la testa?
Sicuramenti è chissu chi pinzati
taliannu mbambulati li culura
di chiù di centu ciuri prufumati:
quantu fu ginirusa la natura!
L’oru di li lumii e lu frumentu,
l’azzolu di lu celu e di lu mari,
li petri antichi, quarchi monumentu:
cosi priziusi di biddizzi rari…
E macari biati vi guduti
carizzi di stu suli chi stralluci…
iu parru, parru e vui nun mi sintiti,
comu si avissi vuci senza vuci.
No, nun aviti oricchi p’ascutari
lu chiantu amaru di sta terra amara,
lu gridu dispiratu d’’i zabbari
di la muntagna finu a la ciumara…
Lu cubbu ciuciulìu di ciumi stanchi
chi pàrinu lamenti di sireni,
comu malati tra li sicchi cianchi
strascìnanu scumazzi di vileni…
No, nun aviti occhi pi taliari
sangu quagghiatu nta li marciaperi
e nun pinzati mancu di cuntari
cruci a migghiara nta li cimiteri…
Sicilia sugnu...e tra li mei duluri
cuvu spiranzi e cinniri d’amuri!
* Per far capire quanto implacabile sia stato in passato (ma lo è ancora a certi livelli) il giudizio dei nostri poeti
dialettali, nei confronti dei versi liberi e moderni, ritengo emblematico quanto singolare riportare “concetti e
condanne” esplicitati da Turi Sucamele nella sua poesia che segue:
|
e-mail -
