“A ‘Gnaziu Buttitta”

Stanotti nun trovu risettu,
nun pozzu dormiri cuètu,
penzu a Buttitta
ca nun voli mòriri
e tuttu scantatu
joca cu la morti
ammucciareddu.
E, comu lu viteddu,
storci lu coddu,
appizza li pedi
e nun voli caminari
pirchì senti lu tanfu
di lu sangu...
Accussì fa Iddu,
quannu si senti sulu
cu la morti acciancu
ca lu ncuèta.
Ma Iddu lu sapi
ca lu veru pueta
nun mori mai?
Lu veru pueta campa
sempi e sempi
nta la notti di li tempi!
E quantu cori accarpa
cu li so’ versi duci!
E trasi a tutti banni
pi porti nichi e granni!
Lu veru pueta
è comu la spiranza:
nun mori mai!
Lu veru pueta
è acqua chi leva siti
è suli chi quadìa
è portu di gioia e festa
‘n menzu ogni timpesta!
E duranti la battagghia
di la vita
è lama di cuteddu
ca quannu tagghia
(ju lu sacciu)
leva tuttu lu marciu
e sana ogni firita.
O granni Vati, ascùtami,
fatti curaggiu
ca mòriri nun poi!
Tu si' comu ‘n-raggiu
vinutu ‘n terra
pi vinciri lu scuru.
Chissu lu sapi Diu
e ju lu sacciu puru;
ju, ca sugnu nuru,
no comu tia vistutu
cu ‘n-linzolu di saggizza.
Ju sugnu strasicuru
ca la to amarizza
è sulu scantu.
Senti zoccu ti dicu:
- Po mòriri lu cantu,
lu cantu miludiusu di ‘n-aceddu?
No! T’arresta ncuddatu
dintra lu saccu di li ricordi,
ma misu tantu 'n-funnu
ca nuddu ti lu scippa.

Ascùta chiddu ca Ti dicu:
- Da chi munnu è munnu,
lu cantu di l’aceddi
s’assimigghia…
Chissa è la meravigghia
di stu camìnu
ca chiamanu distinu.
E nuddu sapi comu,
pirchì e pi quali versu
guverna l’universu!
La morti nun esisti
pi chiddi comu a tia.
Lu veru pueta nun mori
pirchì la puisìa
havi lu sapuri
di l’eternità,
e Tu eternu duri
pirchì ti pasci
jornu pi jornu
d’immortalità…
Comu lu suli
ca stu jornu mori
e dumani rinasci!
***

Odiato o amato, oppure l’uno e l’altro il poeta Lumia? Lui risponde di non avere nemici o avversari “dichiarati” e, comunque, di avere scritto per se stesso, tranne qualche eccezione o ricorrenza di amici. Di sentire come una voce interna che lo costringe a scrivere. Una grande passione di cui è solo uno scrivano al servizio di una voce che non sa da dove provenga…