LI BIDDICA DI FORA E L’EPUCA MUDERNA

Tanti picciotti beddi pi li strati,
cu minigonna, pettu pruvucanti,
capiddi culurati, occhi pittati,
fannu girari ‘a testa puru a ‘i Santi.
Di quannu, speci, chi spuntàu la mora,
iddi, chi senza affruntu né puduri,
stannu cu cianchi e biddica di fora;
sunnu tranquilli, ‘un ànnu russuri.
Quantu canciaru ‘i cosi di ddi tempi,
quannu jò, ancora, era ‘na picciuttedda,
me zia mi dicìa: e m’‘u ricordu sempri,
macari ora chi sugnu vicchiaredda.
St’epuca, idda, ‘a purtava a paraguni,
cuntava: puru dintra, a travagghiari
mittìanu li quasetti di cuttuni
siddu lu zitu putissi spuntari!
…E mi cuntava di lu zu Pippinu,
iddu era zitu c’‘a bedda Ninetta,
stava raccamannu l’addizzu finu
e passa Peppi c’‘a so bicicletta.
Pi lu gran caùru di dda matinata,
stanca, Ninetta, ripusava l’occhiu;
Pippinu l’appi forti ‘na vampata
virennu scuppunatu lu rinocchiu!
Parsi tuccari ‘u celu di luntanu,
si ‘ntisi ‘n paradisu a ciancu a Diu,
‘nveci, ora, tuttu a purtata di manu,
sicuru nun si pinìa lu disìu.
Tannu, li ziti, viniànu vardati,
sulu ogni tantu, scantati e ammuciuni,
pi scanzàrisi paroli e lignati
c’‘u cori ‘n mucca ci niscìa un vasuni.
Mentri s’avvicinava ‘u jornu disiatu,
dintra ‘na stanza la robba appizzata,
l’abitu e ‘u velu tinùtu ammucciatu,
tuttu era prontu pi dda matinata.
Nta ‘u celu li stiddi ancora prisenti
supra ‘u siggiuni a dui, nta ‘u carruzzinu
forti battìa ‘u cori veru cuntenti,
jìanu a l’altari di capu matinu.
A lu ritornu, la granni abbuffata,
‘na tavulata cu bianchi trubberi,
di picciriddi la zita atturniata,
tra li cunfetti, miliddi e bicchieri.
La zita, ora, è c’‘a vesta ciuriata,
la facci russa, trimanti affruntusa;
a lu ‘numani c’era ‘a “bellevata”
e pi ottu jorna stava dintra ‘nchiusa.
La prima sciuta dopu ‘na simana,
iddu, ‘a teni abbrazzettu tuttu priatu
spera chiamari prestu la mammana,
diri: “viniti a fida” a ‘u vicinatu.