ARRIVAU LU JORNU
(d’‘u me pinsionamentu)

Pinseri, fai ‘u va e veni nta la menti,
appressu a li minuti firrìi ‘ntornu
e jò ti mannu dilicatamenti;
ora, ti firmasti, arrivau lu jornu.

Vulissi aviri almenu du’ vint’anni
pi poi, putiri ‘nsemmula ‘nvicchiari;
cu ‘na battuta assicutari affanni,
cu veru amuri leti travagghiari.

Vulissi aviri longhi li me’ vrazza,
accussì a tutti putissi abbrazzari,
lu cori di lu pettu mi si strazza
pinsannu a viatri e chi m’alluntanari;

difatti chiamai assira ‘u muraturi,
pi fari ‘anticchia largu nta ‘u me cori,
sèntivi a mia vicinu a tutti l’uri
fina chi campu, fina chi ‘un si mori.

Mancari a nuddu vogghiu di rispettu,
a nuddu fazzu jò malacrianza,
si nta la prima agnuni di lu pettu
ci ‘mpostu la cumpagna d’‘a me stanza.

Sugnu cummossa e certamenti chianciu,
votu li spaddi e fazzu ‘n’àutra via,
cu nuddu stati certi, chi vi canciu,
vi sarvu sempri nta la menti mia!