LU CARCIARATU

Varcannu ddu cancellu ‘un è chiù nenti,
perdi la casa, ‘a libertà, l’amuri,
ma tra tanti c’è chiddu ch’è ‘nnuccenti
chi chianci e si dispera a tutti l’uri.

Jò chi di fora li talìu appinata,
sti friddi mura strazzanu lu cori;
mi sentu, cririti, veru addulurata
quannu chi pensu a chiddu chi ci mori.

L’aria pigghiata cu lu cuntacocci,
dintra dda cella scura ‘u suli a quatri,
d’‘a libertà ristaru sulu ‘i scocci
cu l’ecu di lu chiantu d’ogni matri.

Nàscinu beddi tutti ‘i picciriddi,
spissu la vita li fa ‘mpirugghiari,
pigghiannu ‘a mala strata st’angiuliddi,
tanti famigghi vannu a ruvinari.

E chianci lu me cori, assai scuntenti,
preju pi sti picciotti carciarati,
ma ‘un putemu fari propriu nenti
pi crisciri sti figghi chiù abbirsati?