PRIJERA E CHIANTU

Nuddu a lu munnu sapi stu duluri,
lu mutu chiantu chi ‘un si fa capiri;
perciò Ti preju cu cori Signuri:
“di nun m’abbannunari, si mi viri!”

Vaiu arrancannu sempri a granni stentu,
passa lu tempu e chiù mi sentu sula;
li me’ pinseri si spàrdanu a ‘u ventu,
funtana l’occhiu e a cocciu a cocciu scula.

E lentamenti tràpana lu pettu
chi comu ramu nuru sbattulìa,
stu cori squetu nun trova risettu,

lu suli di dda supra mi talìa:
sapi chi ‘un c’è chiù chianca a lu me tettu
e sulu Tu, Diu, poi aiutari a mia!