A TURI TOSCANU

A l’arba ti susivi la matina,
a l’aria frisca e pura d’‘a campagna
e prestu, tu, juncivi a la salina
taliànnu l’acqua chi nta ‘i vaschi stagna.

Mentri lu suli araciu ja quariannu
scrivivi, tu, nta ddi bianchi linzola,
senza ‘na pinna, c’‘a menti, pinsannu
‘na puisia chi pi lu munnu vola.

Sti versi foru lustru a ‘u to paisi
e ora sta nutizia: chi duluri!
E tanti “sarannoti⁽¹⁾” e trapanisi

chiàncinu davanti ‘u to ritrattu.
Tra ‘na prijera e centumila ciuri
sfogghianu dd’oru chi lassasti fattu.


⁽¹⁾ “sarannoti”: abitanti di Salina Grande frazione di Trapani