A NINU VIA

Passatu un annu di dda siritina
rivugghi comu fa lu nostru mari,
cu forza, a tramuntana o a la marina
quannu fa dd’acqua tutta agghiummuniàri.

Rivugghi ancora dintra ‘i nostri cori
cu tanta rabbia tuttu stu duluri,
comu s’accetta chi un picciottu mori
p’aviri addiffinnutu ‘i so’ valuri?

E dd’omu vili ‘un ci pinsau ‘n mumentu
e d’‘a to facci t’astutàu ‘u surrisu,
jttannu ‘na famigghia a lu turmentu
amentri tu acchianavi ‘n paradisu.

Tu si lu megghiu ciuri d’‘u jardinu
e Diu ti fici ‘n angilu duratu,
a ciancu d’iddu si lu cherubinu,
lu pridilettu, ‘u chiù priviligiatu.

E niatri, niatri tutti ‘i trapanisi,
passannu suli o puru ‘n cumpagnia,
taliànnu ciuri bianchi a ‘u palu misi
cu affettu ti pinsamu NINU VIA.